Альберт Сиеста: Би Дарья Белодедийг Холливудын дагина болгож чадна
Украины залуу жүдоч Дарья Белодед өнгөрсөн жилээс олны анхаарлыг их татдаг болсон билээ.
Украины залуу жүдоч Дарья Белодед өнгөрсөн жилээс олны анхаарлыг их татдаг болсон билээ. 17 настай охин өнгөрсөн жил насанд хүрэгчдийн Европын аваргын тэмцээнд түрүүлсэн.
Сайн барилдахаас гадна царайлаг хөөрхөн охин тул энэ жилээс жүдогоос өөр салбарынхны анхаарлыг ч өөртөө татаад байгаа юм.
Лавтийн мэргэжлийн боксчин, WBC холбооны дэлхийн аварга асан Майрис Бриедисийн промоутер, англи мэргэжилтэн Альберт Сиеста ч Дарьяаг сонирхож байгаа хүмүүсийн нэг. Тэрбээр Украины “X SPORT” хэвлэлд ярилцлага өгөхдөө хэрэв Дарьягийн менежер болох юм бол түүнийг Холливудын дагина болгоно гэж хэлсэн юм.
Альберт Сиеста “Боксоос гадна дуртай спорт минь жүдо. Би танай Украины 17 настай жүдоч охинд дурлачихаад байгаа. Тэр үнэхээр үзэсгэлэнтэй, англиар ч сайн ярих юм. Дарьяа шиг жүдоч огт байхгүй. Ийм тамирчинтай Украин улс үнэхээр азтай. Хэрэв би түүний менежер байсан бол Дарьяг Холливудын дагина болгож чадах байсан” гэж ярьжээ.