Исламын шашинт эмэгтэй самбочид тусгай өмсгөлтэй боллоо
Эмэгтэй бөхчүүд тусгай өмсгөлтэй болсноор самбочдын тоо нэмэгдэх болно
Монголд болсон Азийн самбо бөхийн холбооны их хурлаар хэд хэдэн асуудал хэлэлцсэний нэг нь Исламын шашинт эмэгтэй самбочдод зориулсан шинэ өмсгөл байлаа. Шинэ өмсгөлтэй болсноор тэд самбогийн өмсгөл дотроо футболка, юүдэн, урт өмд өмсөж болохоор болжээ.
Азийн самбо бөхийн холбооны ерөнхийлөгч Аламжон Муллаев “Бид энэ асуудлыг Азийн олимпийн зөвлөл, Олон улсын самбо бөхийн холбоо зэрэг олон газартай ярилцсан. Тусгай өмсгөлтэй болсноор Исламын шашинтай орны эмэгтэй тамирчид самбо бөхийн тэмцээнд оролцох боломж нээгдэж байгаа юм. Олон эмэгтэй тамирчин самбо барилдмаар байсан ч чаддаггүй байлаа. Исламын улсуудад тулааны урлаг өндөр хөгжсөн. Сая бид Бахрейн улсыг Азийн самбогийн холбоонд гишүүнээр элсүүлж авлаа. Энэ улсад 50 тамирчин самбогоор хичээллэдэг юм байна. Эмэгтэй бөхчүүд тусгай өмсгөлтэй болсноор самбочдын тоо нэмэгдэх болно” гэж сэтгүүлчдэд мэдээлэв.