Г.Занабазарын музей QR кодыг ашиглан үзмэрийн талаарх мэдээллээ хүргэж байна
Музейн хувьд QR кодыг үр дүнтэй ашиглах олон арга бий.
Г.Занабазарын нэрэмжит Дүрслэх урлагийн музей 2018 оны олон улсын музейн өдрийн уриан дор олон шинэ үзэгчийг татах зорилгоор мэдээллийн технологийн шинэ техник дэвшил нэвтрүүлэн, үзэгчиддээ QR кодыг ашиглан үзэсгэлэнгийн үзмэрийн талаарх мэдээллээ хүргэж байна.
QR (Quick Response) кодыг 1994 онд анх Япон улсад зохиосон бөгөөд өдгөө дэлхий даяар олон нийтийн хэрэглээнд нэвтэрчээ. QR код нь ухаалаг гар утас, таблет болон бусад төхөөрөмжөөр уншигдах дөрвөлжин хэлбэрийн шошго ба төрөл бүрийн мэдээлэл дамжуулах, цахим хаягтай холбох зэрэг үүрэгтэй. Музейн хувьд QR кодыг үр дүнтэй ашиглах олон арга бий. Үзмэрийн тайлбарыг уламжлалт хэлбэрээр хүргэхийн хажуугаар энэхүү кодыг ашиглан нэмэлт текст, зураг, видео, аудио болон веб хуудас дахь мэдээллийг үзэгчид өөрийн ухаалаг төхөөрөмж эсвэл музейн таблет ашиглан авах боломжтой. Үүний тулд ердөө тухайн ухаалаг төхөөрөмжиндөө QR код уншигч аппликейшн суулгахад хангалттай.
Энэхүү код нь биет ертөнцийг интернет ертөнцтэй холбох харилцааны шинэ хэрэгсэл юм. Монголд анх удаа QR кодтой “Хөгжмийн зэмсэг” үзэсгэлэн 2018 оны 5-р сарын 16-наас 6-р сарын 6 хүртэл үргэлжилнэ.