Тэрүнофүжи макүшитад унах нь тодорхой боллоо
5 давахгүй бол ирэх тэмцээнд макүшитад унах аюул нүүрлэсэн тул хэдий бэртэлтэй ч дахин барилдсан.
Озэки асан Тэрүнофүжи энэ тэмцээнд жюүрёо зиндааны зүүний 8-д эрэмблэгдэн барилдаж байгаа билээ. Тэрбээр зүүн өвдөгний гэмтлийн улмаас Зуны тэмцээнд 4 унасныхаа дараа тэмцээнийг орхисон. Гэвч 5 давахгүй бол ирэх тэмцээнд макүшитад унах аюул нүүрлэсэн тул хэдий бэртэлтэй ч дахин барилдсан. Харамсалтай нь манай бөх өнөөдөр унаж, зуны тэмцээнд 5 давж, чадахгүй боллоо.
Барилдааны дараа Тэрүнофүжи “Ялна гэж бодож байсан ч... Та бүхний харж байгаачлан болсонгүй” гэж сэтгүүлчдэд ярьсан байна.
Мэргэжлийн сүмогийн түүхэнд озэки байсан бөх макүшитад барилдаж байсан түүх байхгүй. Гэвч Тэрүнофүжи бол нас ахиж, хүч чадал буураад зиндаа буугаагүй, нас ч залуу бөх. Тэрбээр “Макүшитад барилдах болбол озэки байсан бардам зангаа хаяхаас өөр аргагүй. Ийм үед ч цаашид барилдах хүсэл байна. Цаашдаа яах вэ гэдгээ ояката багш, оками сан, ойр дотныхонтойгоо ярилцаж байж шийднэ. Би тайван байна” хэмээн зодог тайлахгүй гэдгээ мэдэгдлээ. Үлдсэн 4 өдөр ч барилдах гэнэ.