Эмэгтэйчүүдийн Азийн АШТ-д түрүүлсэн вьетнам боксчин эрэгтэй байжээ
Олон улсын боксын холбооноос вьетнам тамирчнаас ДНК-ийн шинжилгээ авахад эрэгтэй гэдэг нь батлагдсан
Энэ оны дөрөвдүгээр сарын 17-29-нд Бангкокт болсон Залуучуудын Азийн аваргын тэмцээн дээр нэгэн хачирхалтай үйл явдал болжээ.
Эмэгтэйчүүдийн 57 кг-ийн жингийн финалд Казахстаны Еркежан Даулетжанкызы Вьетнамын До Хонг Нгок нар таарч, өрсөлджээ. Вьетнам тамирчин илт давуу ялж, Аргентинд болох өсвөрийн олимпийн наадмын эрхийг алтан медальтай цуг аваад гэртээ харьсан байна.
Гэвч хэсэг хугацааны дараа вьетнам охин эрэгтэй хүн байсан нь илэрч, шуугиан дэгджээ. Казахстаны багийн дасгалжуулагч Арман Тыныбаев “Азийн аваргын үеэр вьетнам тамирчин олны анхаарлын төвд байсан. Түүний хөдөлгөөн, инээмсэглэл, зодолдох барил нь ч яг л эрэгтэй хүн шиг байлаа. Тэмцээний дараа Олон улсын боксын холбооноос вьетнам тамирчнаас ДНК-ийн шинжилгээ авахад эрэгтэй гэдэг нь батлагдсан” гэж сэтгүүлчдэд ярьжээ.
Тэмцээнээс 2 долоо хоногийн дараа До Хонг Нгокийн тоглох эрхийг хассан. Харин казахстанчууд алтан медалиас гадна Өсвөрийн олимпийн наадмын эрхээ авахаар хөөцөлдөж байна.