Натали Доустын “Хятад хүүхэлдэйнүүд” үзэсгэлэнг маргааш нээнэ
Канадын уран бүтээлч Натали Доустын “Хятад хүүхэлдэйнүүд” үзэсгэлэн маргааш нээгдэнэ.
Канадын уран бүтээлч Натали Доустын “Хятад хүүхэлдэйнүүд” үзэсгэлэн маргааш буюу энэ сарын 12-нд 976 Art Space-д нээлтээ хийнэ.
Гараар өнгөлсөн, хар цагаан, хорин найман ширхэг хэвлэмэл хөрөг зураг үзэсгэлэнд тавигдах ба эдгээрийг урт хугацааны туршид нийгмийн сүүдэрт дарагдан амьдарч ирсэн хятад хүүхнүүдэд зориулан бүтээжээ. Зэрмэгхэн, зөөлөн харагдах хөргүүд өнөөгийн хурдацтай өөрчлөлтөн дунд өөрийгөө олох гэж ядаж буй хятад эмэгтэйчүүдийн тухай өгүүлнэ. Хөргөөс хөрөгт шилжин ажихад зүүдний мэт, эмзэг бас гунигтай дүрүүд харагдаж, өнгөрсөн цагийн шахалт хавчилтаас өөрийгөө чөлөөлөн гаргахыг хүсэн тэмүүлж буй эмэгтэйчүүдийг түүхэн болоод өнөөгийн өнцгөөс харж болох юм.
Канадын Монтреаль хотын "Cégep du Vieux" коллежийг дүүргэсэн уран бүтээлч Натали Доуст нь өөрийн бүтээлүүдээ дэлхийн өнцөг булан бүрт дэлгэн үзүүлж, олон шагнал хүртэж, олон улсын хэвлэл мэдээллээр бичигдэж байжээ.