ФОТО: “ОХУ 2018”-ын нээлтийн ёслол
Нээлтийн ёслол сүрлэг, агуу болсон.
“ОХУ 2018" тэмцээний тусгай сурвалжлагч Ц.Энхтүвшин Москвагаас мэдээлж байна.
Өчигдөр ОХУ-ын нийслэл Москва хотын “Лужники” цэнгэлдэх хүрээлэнд хөлбөмбөгийн ДАШТ эхэллээ. Даян дэлхийг бүтэн нэг сар цэнхэр дэлгэцийн өмнө уях хүн төрөлхтний цэнгэлийн наадам ийнхүү хөшгөө нээлээ.
Нээлтийн ёслол сүрлэг, агуу болсон. 84745 хүний багтаамжтай "Лужники" цэнгэлдэх хүрээлэнд Их Британийн дуучин Робби Уильямс, дуурийн дуучин Аида Гарифуллина, хөгжмийн зохиолч, хөгжимчин Александр Болдачев нар уран бүтээлээ толилуулсан.
Телевизийн хөтлөгч, энэ тэмцээний элч төлөөлөгч Виктория Лопырева “ОХУ ДАШТ 2018” тэмцээний албан ёсны бөмбөгийг барисаар гарч ирэхэд цэнгэлдэх тэр чигээрээ уухайлан хүлээж авсан.
Анхны цохилтыг Бразилийн домогт хөлбөмбөгч Роналдо, тэмцээний бэлгэ тэмдэг болох бэлтрэг Забивака нар хийсэн билээ.