Саудын Араб хөлбөмбөгчдөө шийтгэнэ
0-5 бут ниргүүлсэн Саудын Арабын түшмэдүүд тун ууртай байна.
“ОХУ 2018” тэмцээний нээлтийн тоглолтод нутгийн эзэдтэй тоглож, 0-5 бут ниргүүлсэн Саудын Арабын түшмэдүүд тун ууртай байна.
Юуны өмнө тус улсын Спортын сайд Турки Аль аш-Шейх “Тэд миний нэрийг гутаалаа. Бид тоглогчдоо бэлтгэх гэж дэлхийн шилдэг дасгалжуулагч авчирсан. Гэтэл тэд ийм муу тоглож байдаг. Харамсалтай нь энэ үеийн хөлбөмбөгчдийн хийж чадах зүйл нь ердөө энэ” гэж телевизэд ярилцлага өгөхдөө хэлсэн байна.
Харин Саудын Арабын хөлбөмбөгийн холбооноос тамирчдаа шийтгэнэ гэж мэдэгдсэн юм. Саудын Арабын хөлбөмбөгийн холбооны тэргүүн Адель Иззат “Бид үнэхээр сэтгэлээр унаад байна. Манай баг маш сайн бэлтгэсэн ч тун хангалтгүй үр дүнд хүрлээ. Хэд хэдэн тоглогчийг бид шийтгэхээр болсон. Хаалгач Абдаллах аль-Майюф, довтлогч Мохаммад ас-Сахлави, хамгаалагч Умар Хавсави нар шийтгэл хүлээнэ” гэж мэдэгджээ.