Эрмитажийн зөнч муур Ахилл тоглолтын дүнг таасаар байна
Ахилл ОХУ, Египетийн далбаатай хоёр тавагнаас Оросын далбаатай тавгийг сонгож, хоолоо идсэн.
ОХУ-ын алдарт Эрмитаж музейн муур Ахилл үе уламжлан Эрмитажид хүчин зүтгэж байгаа муур. Түүний өвөө эмээ, аав ээж нь бүгд музейн үнэт зүйлсийг оготно хулганаас хамгаалах үүргийг чин үнэнчээр биелүүлсээр ирсэн юм. Гэхдээ 2 настай Ахилл огт өөр авьяасаараа алдарт гарсан. Шууд хэлэхэд тэр бол зөнч мэргэн. 2017 онд Орост болсон “FIFA Confederations Cup” тэмцээний 3 тоглолтод хэн ялахыг нь тэр үнэн зөв таасан билээ.
Ахилл сониуч, сахилгагүй муур ч дүлий. Тиймээс түүний тааварт ямар нэг байдлаар нөлөөлөх хэцүү. Эрмитажийн ажилтнуудын хэлснээр Ахилл үйл явдлыг задлан дүгнэж чаддаг, маш нарийн мэдрэмжтэй муур гэнэ. Тэр сэтгүүлчдээс айдаггүй, гэрэл зургийн аппарат шуугиж, гэрэлтэж байсан ч анхаарлаа огт сулруулахгүй, таавраа л хийдэг.
Өчигдөр Ахилл ОХУ, Египетийн далбаатай хоёр тавагнаас Оросын далбаатай тавгийг сонгож, хоолоо идсэн. Энэ нь ОХУ-ын шигшээ баг ялна гэсэн үг байлаа. Үнэхээр ч оросууд итгэл төгс ялсан. Дашрамд дурдахад Ахилл ОХУ – Саудын Арабын тоглолтыг ч үнэн зөв таасан юм.