1 мин

“Хил хязгааргүй” сэдэвт Улаанбаатар Олон улсын медиа урлагийн наадам болно

Энэ сарын 28-наас эхэлнэ.

Э.Намуун 2018.06.27

Монголын Урлагийн Зөвлөл (МУЗ) нь соёлын олон төрлийг хөгжүүлэх, техник технологийн дэвшилд тулгуурласан дэлхийн шилдэг бүтээлийг Монголын үзэгчдэд хүргэх, дүрслэх урлагийн салбарын олон улсын хамтын ажиллагааг нэмэгдүүлэх зорилгоор “Улаанбаатар” олон улсын медиа урлагийн наадмыг “Хил хязгааргүй” сэдвийн хүрээнд гурав дахь удаагаа 2018 оны зургаадугаар сарын 28-аас долоодугаар сарын 13-ны хооронд “Үлэг гүрвэлийн төв музей” болон “Playtime” амьд хөгжмийн наадмын үеэр зохион байгуулах гэж байна.

“Хил хязгааргүй” сэдвийн хүрээнд шинжлэх ухаан, технологи, урлагт хил хязгаар, орон зай, ялгаа үгүй гэдгийг харуулсан 8 медиа бүтээлийг Монголын болон АНУ, БНХАУ, Герман, Монгол, Солонгос, Тайванийн 12 уран бүтээлч хамтран толилуулна. Үзэсгэлэнгийн үеэр мэргэжлийн уран бүтээлчид болон оюутан сурагчдад зориулсан медиа урлагийн сургалт, уран бүтээлчдийн “Урлагтай яриа” цуврал уулзалт, ярилцлагыг тус тус зохион байгуулна.

Тус наадмын албан ёсны ивээн тэтгэгч, хамтрагчаар Нидерландын “Стимулеринг” сан, “ТodaysArt” олон улсын медиа урлагийн наадам, “Төгөлдөр” сан, “Чингис” зочид буудал, “Гёте” Институт, АНУ-ын Элчин Сайдын Яам, ХАС Банк, дэмжигчээр Mongolia Quest, Занабазарын нэрэмжит Дүрслэх урлагийн музей, MN17 галерей тус тус ажиллаж, Улаанбаатар олон улсын медиа урлагийн наадмыг дахин Монголын үзэгчдэд хүргэхээр боллоо.

Наадмын дэлгэрэнгүй мэдээллийг цаг тухай бүрт нь эндээс зочилж авна уу. Та бүхнийг Улаанбаатар олон улсын медиа урлагийн наадамд урьж байна.