“Aum Shinrikyo”-гийн Асахара Шёоког цаазалллаа
2004 онд Асахараг алан хядах үйл ажиллагаа болон өөр 12 гэм хэрэгт буруутган, цаазаар авах ял оноосон юм.
Японы шашны “Aum Shinrikyo” байгууллагын үүсгэн байгуулагч, тэргүүн Асахара Шёоког өнөөдөр өглөө 6 цагт дүүжлэн цаазалжээ. Түүнтэй хамт бүлгийнх нь 7 хэрэгтнийг цаазалсан байна.
2006 онд Японы Дээд шүүхээс түүний цаазын ялыг баталснаас хойш ийнхүү 12 жилийн дараа ялыг гүйцэтгэж байгаа юм. Харин хийсэн хэрэг нь бол бүр 1995 оных.
“Aum Shinrikyo” байгууллагын гишүүд 1995 оны гуравдугаар сарын 20-нд Токиогийн метронд зарин хий цацан, халдлага үйлдэж, 12 хүний амь насыг хохироосон юм. Мөн зорчигч болон метроны ажилтан нийт 5000 гаруй хүн хордсон билээ. Асахара Шёоко болон тэдний хамсаатныг баривчлан 1996 онд шүүсэн.
Шүүх ажиллагаа удааширсаар 2004 онд Асахараг алан хядах үйл ажиллагаа болон өөр 12 гэм хэрэгт буруутган, цаазаар авах ял оноосон юм. Гэвч өмгөөлөгч нар нь давж заалдан, Асахараг сэтгэл зүйн хувьд хэвийн биш гэж заргалдсаар дахиад хэдэн жил өнгөрсөн. Олон удаагийн сэтгэл зүйн шалгалтын дараа шүүхээс Асахараг хэвийн гэж үзэн, 2006 онд цаазын ялыг гүйцэтгэх эцсийн шийдвэр гаргаж байв.