Найман начин төрж, төр түмнээ шуугиулаад байна
Тавын даваа үргэлжилж байна.
Тулгар төрийн 2227, Их Монгол Улсын 812, Ардын хувьсгалын 97 жилийн ой, Үндэсний Их Баяр наадмын хүчит бөхийн барилдааны тавын даваа үргэлжилж байна. Начны даваанд Хөвсгөл аймгийн Их-Уул сумын харъяат, аймгийн арслан Батбаярын Даваа-Очир улсын заан Б.Батмөнхөөр тав давж начны болзол хамгийн түрүүнд хангалаа. Түүний араас Баянхонгор аймгийн Заг сумын харъяат цэргийн арслан Дашдоржийн Цэрэнтогтох улсын арслан П.Бүрэнтөгсөөр тав даван начин цол хүртэж, наадамчин олныг шуугиулав.
Сүхбаатар аймгийн Асгат сумын харъяат бөх, аймгийн арслан Баярсайханы Батжаргал Дархан аварга Г.Өсөхбаяраар тав давж начин цолны болзол хангасан бол Булган аймгийн Гурванбулаг сумын харъяат аймгийн арслан Дашзэвэгийн Амаржаргал улсын гарьд Б.Гончигдамбаар тав давж начин цолны болзол хангасан юм.
Мөн Сүхбаатар аймгийн Онгон сумын харъяат Ш.Мөнгөнбаатар улсын заан М.Өсөхбаяраар тав давсан бол Баянхонгор аймгийн Баянбулаг сумын харъяат аймгийн арслан Н.Золбоо Ховд аймгийн Зэрэг сумын харъяат улсын харцага Б.Бат-Өлзийг өвдөг шороодуулж начин цолны болзол хангалаа. Завханы Отгон сумын харъяат Төрмөнхийн Бэгзсүрэн улсын заан Найдангийн Түвшинбаяраар тав давж начин боллоо.