Точиношин ч барилдахгүй
Яаж ийгээд 3 давахгүй бол шинэ озэки дараагийн башёд кадобан болох болно.
Энэ жилийн Нагоя башё томчуудад халтайхан үргэлжилж байна. Хэрэв Японы ёкозүна Кисэносатогийн барилдахгүй байгаад бөх сонирхогчид хэдийнэ дассан бол харин энэ удаад их аварга Хакүхо тэмцээний 4 дэх өдрөөс, ёкозүна Какүрюү 6 дахь өдрөөс тэмцээнээс гарч, нэг ч аварга үлдсэнгүй. Дээр нь нэмэгдээд өнөөдрөөс эхлэн шинэ озэки Точиношин ч барилдахгүй болжээ.
Точиношин өчигдөр Тамавашид унахдаа баруун хөлөө гэмтээсэн байна. Барилдааны дараа сэтгүүлчдэд “Өвдөг эвгүй нугараад явчихсан. Гэхдээ өвдөгнөөс илүү баруун хөлний эрхий хуруу эвгүй бочихлоо” гэж ярьж байсан юм.
Өнөөдөр Касүгано ояката “Баруун хөлний эрхий хуруу хугарсан байж ч магадгүй. Хавдаад барилдах ямар ч боломжгүй болсон” гэж мэдээллээ. Точиношин 5 давж 1 унаад байлаа. Шинэ озэки Токио явж, дахин шинжилгээ хийлгээд барилдах боломжтой болбол тэмцээний голоос барилдах бодолтой байгаагаа хэлсэн. Яаж ийгээд 3 давахгүй бол шинэ озэки дараагийн башёд кадобан болох болно.