3 мин

ДАШТ-ий үеэр явагдсан 10 том наймаа

Дахиад л “Ювентус”. Энэ зун Италийн баг мөнгө гамгүй зарж байна.

М.Сугар-Эрдэнэ 2018.07.18 19 13 10

Биднийг “ОХУ 2018” ДАШТ үзэж байх хооронд дэлхийн хөлбөмбөгийн зах зээл дээр маш олон наймаа явагдсан. Үүнээс хамгийн том 10 наймааг танилцуулж байна.

КРИШТИАНУ РОНАЛДУ – “Реал”-аас “Ювентус”

Үнэ: 112 сая евро
Криштиану замналынхаа сүүлийн хэсэгт шинэ сорилтод орохоор шийдсэн. 33 настай тоглогчид 112 сая төлж байсан түүх байхгүй.

РИЯД МАРЕЗ – “Лестер”-ээс “Манчестер Сити”

Үнэ: 68 сая евро
Алжир тоглогч “Лестер”-ээс гарахаар аль хэдийнэ шийдээд байсан. Английн аварга болсноосоо хойш 2 жилийн турш том багт очих гэсэн боловч баг нь түүнд хэт өндөр үнэ тогтоож, саад болоод байлаа. Дургүйд хүчгүй гэгчээр өнгөрсөн улиралд тэр хичээгээгүй. “Лестер”-ийн түүхэн дэх хамгийн том наймаа.

ЖОРЖИНЬО – “Наполи”-гоос “Челси”

Үнэ: 57 сая евро
“Челси”-гийн шинэ дасгалжуулагч Маурицио Сарри хуучин багийнхаа сайн тоглогчийг аваад ирсэн. Роман Абрамович ч мөнгө харамлаагүй. Ур чадвар нь дэндүү хурдан хөгжиж байгаа Жоржиньо Неапольд үлдэх ёсгүй байлаа. 57 саяас гадна бонус болгож 8 сая евро “Челси” төлнө. Ирэх улирлын “Челси”-д Жоржиньо гялалзана.

ЖОАУ КАНСЕЛУ – “Валенси”-гаас “Ювентус”

Үнэ: 40 сая евро
“Юве” энэ зун 200 сая евро наймаанд зарцуулаад байна. “Валенси”-гийн хамгаалагч Жоау Канселу “Интер”-т зээлээр тоглохдоо үнэхээр гялалзсан. “Интер” түүнийг үлдээхийг хүссэн ч 40 сая байгаагүй. Тэр талбайн баруун талд Штефан Лихштайнерийн оронд зүтгэх болно.

РАДЖА НАИНГГОЛАН – “Рома”-гаас “Интер”

Үнэ: 38 сая евро
Тун ойлгомжгүй наймаа. Дасгалжуулагчтай таарамж муугаас ДАШТ-д оролцож чадаагүй Раджа 2022 он хүртэл гэрээ байгуулсан. Харин яагаад “Рома”-гаас гарсан шалтгаан тодорхой бус.

КЛЕМАН ЛАНГЛЕ – “Севилья”-гаас “Барселона”

Үнэ: 36 сая евро
“Барселона” хамгаалалтаа бэхжүүлсээр байна. Өнгөрсөн улиралд Клеман Лангле лигийн шилдэг тоглогчдын нэг болсон. 23 настай франц залууг “Барса” маш өндөр үнэлсэн. Түүнтэй 5 жилийн гэрээ байгуулаад авахыг хүссэн баг 300 сая евро төлөх ёстой гэж оруулсан. Жерар Пикегийн тоглох цаг хорогдож, “Барса”-гийн төвийн хамгаалалт Лангле – Самюэль Умтити гэсэн франц хамгаалалт болж магадгүй.

ЛУКАС ТОРРЕЙРА – “Сампдори”-гаас “Арсенал”

Үнэ: 30 сая евро
Унай Эмери сонирхолтой наймаа хийсээр байна. Торрейра ДАШТ-д Уругвайн төлөө 5 тоглосноос 3-т нь гараанд гарсан.

ХАВЬЕР ПАСТОРЕ – “ПСЖ”-гээс “Рома”

Үнэ: 25 сая евро
Францад авьяас чадвараа бүрэн гаргаж чадаагүй аргентин залуу Италид буцлаа. Наингголанаа зарсан “Рома” байранд нь Пасторег авсан. Пасторе Францад 19 цом авсан ч сайн тоглож чадаагүй. 29 настай, маш авьяаслаг энэ тоглогчийг 25 саяар авна гэдэг ашигтай наймаа.

ЖАНЛУИЖИ БУФФОН – “Ювентус”-аас “ПСЖ”

Үнэгүй
Жижи Аваргуудын лигэд түрүүлэх мөрөөдлөө Парист биелүүлнэ гэж найдаж байна. Түрүүлтлээ зодог тайлахгүй шинжтэй.

ЭМРЕ ЖАН – “Ливерпуль”-ээс “Ювентус”

Үнэгүй
Дахиад л “Ювентус”. Энэ зун Италийн баг мөнгө гамгүй зарж байна. Гэхдээ Жаныг үнэгүй авахаар өвөл тохиролцсон байлаа. Үнэгүй тул Роналдуд мөнгө гаргах боломжтой болсон хэрэг.

М.Сугар-Эрдэнэ 2018.07.18