1 мин

Алиссон дэлхийн хамгийн үнэтэй хаалгач боллоо

Алиссон бол цаг үеийг тодорхойлох агуу хаалгач

М.Сугар-Эрдэнэ 2018.07.20 18 14 14

Английн “Ливерпуль” баг Италийн “Рома”-гаас бразил хаалгач Алиссоныг 75 сая еврогоор авч, нэгэн шинэ рекорд тогтоолоо. Өнөөдрөөс эхлээд Алиссон дэлхийн хамгийн үнэтэй хаалгач болж байгаа юм. Түүнээс өмнө энэ рекордыг Жанлуижи Буффон “Парма”-гаас “Ювентус”-т 52,9 сая еврогоор шилжсэнээр эзэмшиж байв.  

Хаалгач Лорис Кариусийн аймшигтай алдаагаар Аваргуудын лигийн цомоо алдсан “Ливерпуль” энэ зун сайн хаалгач худалдаж авах нь тодорхой байсан. Гэхдээ ийм өндөр үнээр авна гэж шинжээчид бодож байсангүй.
Алиссон 2016 онд Бразилийн “Интернасьонал” багаас “Рома”-д 7,5 сая еврогоор ирж байлаа. Тэгэхээр түүний үнэ хоёр жилд 10 дахин өссөн гэсэн үг. Эхний улиралдаа тэр нэг ч удаа талбайд гаралгүй, Войцех Шченсныгийн сэлгээнд сууж байлаа. Харин польш хаалгач явсны дараа үндсэн хаалгач болсон юм.

“Ливерпуль” ямар гэрээ байгуулснаа нууцалж байгаа ч ямар ч гэсэн 6 жилийн гэрээ байгуулжээ. Харин цалингийн хэмжээ тодорхойгүй.
Алиссон өнгөрсөн улиралд хаалгандаа ирсэн цохилтуудын 79,26 хувийг хаасан гэсэн үзүүлэлттэй. Европт Түүний өмнө хоёр л хаалгач энэ үзүүлэлтээр орсон. Давид Де Хеа (80,28 хувь), Ян Облак (82,68 хувь).

“Рома”-гийн дасгалжуулагч асан Роберто Негрисоло “Ямар супер одтой болсноо удахгүй “Ливерпуль” ойлгох болно. Одоо хүмүүс Алиссон гэж хэн бэ гэдгийг сайн мэдэхгүй байна. Энэ залуу бол агуу. Тэр хаалгач нарын дундах Месси. Яагаад гэвэл тэр ялагч. Алиссон бол цаг үеийг тодорхойлох агуу хаалгач болно” гэж хэлсэн байна.

М.Сугар-Эрдэнэ 2018.07.20