“Burberry” 36 сая долларын зарагдаагүй бараагаа шатаажээ
Энэ нь өөрийн оюуны өмчийг хамгаалах зорилготой гэнэ.
Хувцасны загвар гэдэг хэцүү бизнес. Гэхдээ хямдруулаад заралгүй яагаад заавал устгах хэрэг байсан юм бол?
Их Британийн “Burberry” компани брэндээ хамгаалахын тулд жил бүр зарагдаагүй үлдсэн хувцас, гоёл чимэглэлээ устгадаг. Энэ нь өөрийн оюуны өмчийг хамгаалах зорилготой гэнэ. Учир нь үнээ бууруулна гэдэг брэндийн нэр хүндэд халтай аж.
2017 онд тус компани нийт 36 сая долларын барааг шатаасан нь өнгөрсөн жилийнхээс 6 хувь илүү байгаа юм. Сүүлийн 5 жилд “Burberry” ойролцоогоор 117,5 сая долларын бараагаа устгасан байна.
Борлогдохгүй байгаа загвараа устгахдаа аюулгүй, экологид ээлтэй арга хэрэглэдэг, бараа шатаасан эрчим хүчийг дараагийн загвар хийхэд зориулдаг гэж тэд мэдэгддэг ч Greenpeace эрс эсэргүүцэж байгаа юм. Greenpeace: “Burberry өөрийн бүтээгдэхүүн, ажилчдын хөдөлмөр, ашигласан материал гээд олон зүйлийг огт үнэлж, хүндлэхгүй байна. Чанартай сайн барааг устгаснаас үйлдвэрлэлийн хэмжээгээ багасгаж, хэмнэлттэй ажиллах ёстой” гэж мэдэгджээ.