Месут Озил арьс өнгөөр ялгаварлах үзлээс болж Германы шигшээг орхилоо
Шигшээ баг амжилттай тоглоход би тэдний хувьд герман хүн, амжилтгүй муу тоглохоор цагаач
Германы шигшээ багийн тоглогч Месут Озил Германы хөлбөмбөгийн холбооны арьс өнгөөр ялгаварлан гадуурхах бодлогын улмаас шигшээ багаас зодог тайлж байгаагаа зарлалаа. Озил твиттер хуудсаараа дамжуулан энэ талаараа мэдэгдсэн юм.
“Сүүлийн үед болсон үйл явдлуудыг удаан бодож тунгаасны эцэст би шигшээ багт дахин тоглохгүй байхаар шийдлээ. Яагаад гэвэл би үл хүндэтгэл, гарал үүслээр гадуурхаж байгааг мэдэрч байна. Надад маш хүнд байна. Би Германы шигшээ багийн өмсгөлийг бахархалтайгаар өмсөж байсан бол одоо энэ мэдрэмж алга болжээ. Би хамаг хүч чадлаа шигшээ багт зориулдаг байсан болохоор ийм шийдвэр гаргахад хэцүү байлаа. Гэвч Германы хөлбөмбөгийн холбооны өндөр албан тушаалын түшмэд миний турк гаралыг хүндлэхгүй, улс төрийн тоглоомд хутган оруулж байгааг би тэвчиж чадахгүй нь. Шигшээ баг амжилттай тоглоход би тэдний хувьд герман хүн, амжилтгүй муу тоглохоор цагаач болон хувирч байна” гэж бичжээ.
Озил Туркийн Ерөнхийлөгч Эрдоантай хамт зураг авахуулснаас хойш элдэв шүүмжлэлд өртөөд байгаа. Тэрбээр Германы шигшээ багт 2009 оноос тоглож, 2014 онд дэлхийн аварга болсон. Нийт 92 тоглолтод оролцож, 23 гоол оруулсан юм.