Туркт “Озил фашистуудын хаалганд гоол орууллаа” гэж дүгнэв
Туркийн улстөрчид ихэд сэтгэл ханамжтай хүлээн авлаа.
Германы турк гаралтай хөлбөмбөгч Месут Озил Германы хөлбөмбөгийн холбооны арьс өнгөөр ялгаварлан гадуурхах үзлээс болж, шигшээ багаас зодог тайлснаа зарласан билээ.
Германы Засгийн газар, Хөлбөмбөгийн холбоо түүний турк гарал үүслийг улстөрийн зорилгоор ашиглаж байгааг Озил эсэргүүцэж, “Шигшээ баг амжилттай тоглоход би тэдний хувьд герман хүн, амжилтгүй муу тоглохоор цагаач болон хувирч байна” гэж бичсэн юм. Өнгөрсөн тавдугаар сард Туркийн Ерөнхийлөгч Эрдоан Лондонд ажлын айлчлал хийх үеэрээ Месут Озил, Гюндоган нартай уулзаж, зураг татуулсан. Германд тамирчдыг дарангуйлагчтай хамт зураг авахууллаа хэмээн шүүмжилсэн.
Озилийн шигшээ багаас зодог тайлах шийдвэрийг Туркийн улстөрчид ихэд сэтгэл ханамжтай хүлээн авлаа.
Туркийн Хууль зүйн сайд Абдулхамит Гюль “Озил энэ шийдвэрээрээ фашистуудын хаалганд гоол орууллаа” хэмээн бичсэн бол Залуучууд, спортын сайд Мехмет Касапоглу “Бид ах дүү Месут Озилийнхоо энэ шийдвэрийг зүрх сэтгэлээсээ дэмжиж байна” гэж жиргэсэн байна. Туркийн Ерөнхийлөгчийн албан ёсны төлөөлөгч Ибрагим Калын ч мөн дэмжсэн сэтгэгдэл үлдээжээ.