1 мин

"Sony Pictures" Youtube-д трейлер оруулах гэж байгаад бүтэн киногоо оруулжээ

Ийм л юм болсон юм даа.

О.Анхзаяа 2018.07.24

"Бүтэн киногоо бараг яриад өгчихлөө шүү дээ" гэж хэлмээр санагдтал хамаг бүхнээ дэлгэсэн трейлерүүд байдаг даа? Энэ бол түүнээс ч илүү.

Энэ долдугаар сарын эхэнд "Sony Pictures" компани Youtube-д киноны трейлер оруулах гэж байгаад бүтэн киногоо оруулсан юм."Khali the Killer: Official Red Band Trailer" гэсэн гарчигтай бичлэг Youtube хуудсанд ороход мэдээж над мэтийн шинэ бичлэг ирэхэд дохио ирдэг тохиргоо тавьсан хүмүүс шуураад л оролгүй яах вэ.

Тэнд юун албан ёсны Red Band трейлер, харин ч 89 минутын турш үргэлжлэх гэмт хэрэг, драма төрлийн кино байж таарсан юм. Дээрээс нь кредит хэсэгтэйгээ. 2016 онд зураг авалт хийгдэж дууссан энэ кино тэр даруй 11,000 хүнд хүрч орхисон байна.

Гэтэл тэд киног хэр удаж байж устгасан гэж бодож байна?

Бүтэн 6 цагийн дараа тэд устгасан. Энэ кино наймдугаар сард АНУ-ын хэд хэдэн кино театрт нээлтээ хийх ёстой байсан юм. Харин Нидерландад аль хэдийн "Blu-Ray"-ээр гарчихсан байсан. Мөн 2017 оны арваннэгдүгээр сард Германд гарч байсан юм. Киног Жон Мэттьюс найруулснаас гадна "IMDb" дээр бүтэн 10 онооноос 3.8 гэсэн үнэлгээг авсан байжээ.

Зүгээр л трейлер үзэх гээд ортол бүтэн кино нь байж байна гээд төсөөл дөө. Гэхдээ бид энэ бүхнээс юуг анхаарах хэрэгтэй вэ гэвэл, оруулсан пост, зураг, бичлэгээ сайтар хянаж байгаарай. Магадгүй таны хүсээгүй зүйл олонд тарж мэдэх юм шүү.

Жинхэнэ трейлер: