мин

“Aum Shinrikyo”-гийн үлдсэн 6 удирдагчийг өнөөдөр цаазалжээ

Өнөөдөр үлдсэн 6 хэрэгтний цаазын ялыг гүйцэтгэлээ гэж Японы хэвлэлээр мэдээлж байна.

М.Сугар-Эрдэнэ 2018.07.26 40 38 33

10

Японы шашны  “Aum Shinrikyo” байгууллагын цаазын ял сонссон байсан 13 удирдагчаас 7-г нь тэргүүн Асахара Шёокогийн хамт энэ сарын 6-нд цаазаар авсан билээ. Өнөөдөр үлдсэн 6 хэрэгтний цаазын ялыг гүйцэтгэлээ гэж Японы хэвлэлээр мэдээлж байна.
Энэхүү 6 хэрэгтэн болох Саторү Хашимото, Торү Тоёда, Кэничи Хиросэ, Ясүо Хаяши, Масоато Ёкояма, Казүаки Оказаки нар зарин хорт хий үйлдвэрлэсэн, химийн зэвсэг хэрэглэж олон хүний амь насыг хохироосон хэргээр цаазын ял сонсоод байсан билээ.

Японы Хууль зүйн яамны сайд Ёко Камикава өнөөдөр хэвлэлийн бага хурал дээр “Өнөөдөр бид үлдсэн 6 хэрэгтний ялыг гүйцэтгэсэн. Тэдний гэм буруугаас болж, маш олон хүн амиа алдаж, олон хүн тахир дутуу болсон. Хохирогчдын туулсан зовлон, тэдний гэрбүлийнхний амссан зүдгүүрийг хэмжихийн аргагүй. Бид нөхцөл байдлыг сайтар судласны эцэст ялыг гүйцэтгэх тушаал өгсөн” гэж хэлсэн байна.

Шашны “Aum Shinrikyo” байгууллага 1987 онд байгуулагдсан. Нэг хэсэг 30-50 мянган гишүүнтэй байсны 10 мянга нь оросууд байлаа. Манай хойд хөршид ерөөд оны үед тун хүчээ авч байсан бүлэглэл юм. 1994 онд тус бүлгийнхэн Нагано мужийн Мацүмото хотод зарин хий цацаж 7 хүн, 1995 онд Токиогийн метронд химийн халдлага хийн 13 хүний амь насыг хохироосон юм. Нийт 6,3 мянган хүн их бага ямар нэг хэмжээгээр хордсон байдаг. Цагдаагийн газраас бүлэглэлийн удирдагчдыг баривчилсан ч хоёр хэрэгтэн 2012 он хүртэл зугтан зайлж чадсан юм. Үүнээс болоод цаазын ял хойшилсон байна. 2002 онд Токио, Аоморид алан хядлага үйлдэнэ хэмээн Японы Засгийн газрыг сүрдүүлж, Асахара Шёоког суллахыг шаардах гэж байсан Оросын террорист бүлэглэл баригдаж байв. Тэд Асахараг ОХУ-ын Алс Дорнодод орогнуулах төлөвлөгөөтэй байсан ч бүгд баригдаж, шүүхээр шийтгэгдсэн юм.
Ийнхүү өнөөдрийн цаазын ялын гүйцэтгэлээр “Aum Shinrikyo” байгууллага үндсэндээ төгслөө гэж хэлэхэд болно.

М.Сугар-Эрдэнэ 2018.07.26

10