Цагдаагийн үнэрч нохойн толгойг мафиуд 200 саяар үнэлжээ
Сүүлийн 3 жилд тэр нохой 9 тонн кокаин илрүүлсэн нь хар тамхины бүлэглэлд хүнд цохилт болжээ.
“Колумбын хар тамхины мафиас гаалийн газрын “Хий үзэгдэл” нэртэй үнэрч нохойн толгойг 200 сая песогоор (69,5 мянган доллар) үнэллээ” гэж “Tvnotas” сайт мэдээллээ.
Колумбын Цагдаагийн газарт хүчин зүтгэдэг энэхүү овчарк нохой нийт 300 ажиллагаанд оролцож, 246 хар тамхины наймаачин барихад тусалсан гавьяатай нохой. Сүүлийн 3 жилд “Хий үзэгдэл” 9 тонн кокаин илрүүлсэн нь хар тамхины бүлэглэлд хүнд цохилт болжээ. Тус бүлэглэлийн босс Дарио Усуга цагдаа нарт хандан, нохойг барьж өгвөл 200 сая песо амалсан нь саяхан илэрсэн байна.
Цагдаагийн газраас “Хий үзэгдэл”-ийн аюулгүй байдлыг хангахын тулд Боготагийн “Эль-Дорадо” нисэх буудалд шилжүүлсэн байна.