Тайвань эмч нар Баян-Өлгийд үнэгүй тусламж, үйлчилгээ үзүүлнэ
Тайвань улсад эмч нарыг мэргэжил дээшлүүлэх сургалтанд хамруулах талаар санал тавьж тохиролцоонд хүрлээ.
Баян-Өлгий аймгийн Засаг даргын урилгаар Тайваний шилдэг мэргэжлийн эмч сувилагч нараас бүрдсэн 29 хүний бүрэлдэхүүнтэй баг тус улсын “Фүжи Нийгэмлэг”-ийн халамж, буяны сангийн дэмжлэгээр эрүүл мэндийн тусламж үйлчилгээг үнэ төлбөргүй үзүүлэхээр хүрэлцэн ирлээ.
Эмч нарын баг 2018 оны 07 дугаар сарын 31-ний өдрөөс эхлэн 08 дугаар сарын 03-ны өдөр хүртэл тус аймгийн Эрүүл мэндийн газар болон Нэгдсэн эмнэлэгт иргэдэд үнэ төлбөргүй эрүүл мэндийн тусламж үйлчилгээ үзүүлж үзлэг шинжилгээнд хамруулан тохирох эмийг олгож ажиллах юм.
Тэднийг өнөөдөр аймгийн Засаг дарга А.Гылымхан хүлээн авч уулзан, өндөр настан болон амьдралын бололцоо тааруу алслагдсан сум багийн иргэдэд онцгой анхаарал хандуулан ажиллахыг санал болголоо.
Мөн уулзалтын үеэр эрүүл мэндийн хамтын ажиллагааны чиглэлээр жил бүр тус аймгаас Тайвань улсад эмч нарыг мэргэжил дээшлүүлэх сургалтанд хамруулах талаар санал тавьж тохиролцоонд хүрлээ.