Африкт Оросын сэтгүүлчид алагджээ
Тэд хувийн цэргийн компани болох “Вагнер”-ийн талаар материал цуглуулж байсан юм.
Төв Африкийн БНУ-д ОХУ-ын сэтгүүлчид алагдсан байна. Сэтгүүлч Орхан Жемаль, найруулагч Александр Расторгуев, оператор Кирилл Радченко нар тус улсад баримтат киноны ажлаар явж байжээ. Тэд хувийн цэргийн компани болох “Вагнер”-ийн талаар материал цуглуулж байсан юм. “Вагнер” нь хөлсний цэргүүд элсүүлж, дэлхийн халуун цэгүүд, тэр дундаа Украинд ч илгээн тулалдуулдаг байгууллага юм.
Reuters агентлагийн мэдээлснээр зэвсэглэсэн гэмт этгээдүүд тэдний машиныг отолтонд оруулж дайрсан байна. Жолооч амьд үлдэж, машинд байсан бусад хүмүүс амь үрэгджээ. Зарим хэвлэлийн хэрэгслийн мэдээгээр аллагын зорилго нь дээрэм байсан гэнэ.
2013 онд Төв Африкийн БНУ-д засгийн эрхийг исламын шашны "Селека" бүлэглэлийн босогчид булаан авсан байдаг. Тус улсын хүн амын ихэнх нь христийн шашинтан бөгөөд талууд цус асгаруулан тулалдсаны эцэст 2014 онд "Селека" бүлэглэл засгийн эрхийг буцаан өгсөн. НҮБ-ын энхийг сахиулах хүч байдаг ч одоо хүртэл дайн дажин үргэлжилсээр байна.