Кайла Харрисон 16-нд 2 дахь тулаанаа хийнэ
Эхний тулаандаа тэр өчих мэхээр итгэл төгс ялсан.
Олимпийн хошой аварга (2012, 2016), 2010 оны дэлхийн аварга, Америкийн анхны олимпийн алтан медальт жүдоч Кайла Харрисон хоёр жилийн өмнө холимог тулаанд шилжсэнээ зарлаж байсан билээ. Кайла WSOF (World Series of Fighting) холбоотой гэрээ байгуулсан. WSOF нь Америкт 3-т ордог том холбоо юм.
Эхний тулаанаа тэр энэ жилийн зургаадугаар сарын 21-нд PFL 2 тэмцээнд хийж, Brittney Elkin-ийг өчих мэхээр буулгаж авсан. Жүдоч хүн өөр ямар мэхээр ялах билээ дээ.
Ингээд WSOF холбооноос түүний дараагийн тулааны товыг зарлалаа. Энэ сарын 16-нд Атлантик Ситид Кайла Жозетт Коттонтой хоёр дахь тулаанаа хийх болно.
Кайла Харрисон 22 настайдаа Лондонгийн олимпийн 78 кг-ын жинд аварга болж байсан бол “Рио 2016” наадамд бүх өрсөлдөгчөө иппон цэвэр ялсан гайхамшигтай жүдоч билээ. Риогийн олимпийн дараа “Жүдо бол миний хамгийн хайртай зүйл. Гэхдээ нэр алдартай хүн болохыг бүгд хүсдэг биз дээ. Би тор, рингэн дээр их мөнгө олохын тулд өрсөлдөгчөө цохин унагааж чадна гэж боддог” гэж ярьж байсан тул холимог тулаанд орох нь хэмээн хэвлэл мэдээллээр бичиж байсан юм.