Үйлчилгээний газар ПИН кодоо алдахаас сэргийлэх аргууд
Дэлгүүр, супермаркет, ресторан, колонк гээд л бараг бүх үйлчилгээний газар үйлчлүүлэгчийнхээ ПИН кодыг шууд л асууж орхидог. Сандарч тэвдээд л бид 4 оронтой нууц дугаараа дэлхий даяар зарлачих нь бий. Тэгтэл таны ард дугаарлаж буй хүн картын нууц дугаар цээжлээд, түрийвч хулгайлчихвал яах вэ? Картанд буй мөнгө тэр чигтээ алга болно л гэсэн үг. Харамсалтай нь, энэ тохиолдолд картын ПИН кодоо бусдад тараасан таны буруу болж хувирна.
Тиймээс нууц үгээ хэрэглэгч та өөрөө л хамгаалах хэрэгтэй шүү. Ингээд үйлчилгээний газар ПИН кодоо алдахаас сэргийлж, хүмүүс амьдрал дээр ямар арга хэрэгжүүлдгийг хамтдаа харцгаая.
Юуны өмнө, тун бүдүүлэг аргаас эхэлье. Таны ПИН код хэд вэ гэж асуувал “Би өөрөө хийе” гэж шууд хэлээрэй.
Ингээд ч болохгүй бол хоёр карт ашиглах арга байдаг юм байна. Өөрийн хэрэглээнд таарсан мөнгөө нэг картандаа хийгээд, үүнийхээ ПИН кодыг дэлхий даяар зарласан ч болно.
Харин ийм үед СУЛ ГАРАА ашиглаж, картын нууц дугаараа хамгаалаарай. Эсвэл түрийвчээрээ далдалж ч болно.
Шатахуун худалдаж авахдаа бэлэн мөнгөөр үйлчлүүлж болох юм. Шатахуун түгээх газрын ойролцоо ихэвчлэн ATM байдаг учраас тэндээс бэлэн мөнгө аваарай.
Тэгээд ч колонкийн ажилтнуудын зовлонг ойлгож болно. Хүйтэн уур амьсгалаас шалтгаалан ПОС-ын машин "бээрчихдэг" тохиолдол цөөнгүй гардаг гэнэ. Тиймээс ч колонкийн ажилтнууд таны картыг авч явахдаа нууц үг цээжилдэг юм байна.
Ресторанд үйлчлүүлэхдээ аль болох кодоо хэлэхгүй байх хэрэгтэй. Таны кодыг асуугаад байвал “ПОС-ын машинаа аваад ирээч. Би өөрөө хийе” гээд эелдэг гуйгаарай. Тэгээд ч цахим гэмт хэрэгтнүүд ресторанд зөөгчөөр ажилд орж, бусдын нууц үгийг авах хандлагатай болсон гэнэ.
Үйлчилгээний газруудын зөөгч, кассууд картын пин код чинь хэд юм бэ гээд биднийг загнаад аваад байдаг. Бид загнуулаад өгөөд байдаг. Энэ чинь бараг шахуу хууль бус үйлдэл бөгөөд бид цахим түрийвчээ бусдад шууд хүчээр нээгээд өгч байгаа юм байна шүү дээ! Пин кодоо хэнд ч бүү хэл pic.twitter.com/ttO6G9SK64
— Ganzorig Vanchig (@ganzorigv) April 26, 2018
Цахим Банкны үйлчилгээгээр тэргүүлэгч ХААН Банк нь яг энэ асуудалд ихээхэн анхаарч өнгөрөгч дөрөвдүгээр сард “Цахим банкны аюулгүй байдал ба төлбөрийн эрсдэл” олон улсын анхдугаар форумыг Монголбанк, Монголын Банкуудын Холбоотой хамтран зохион байгуулж, салбар бүрийн экспертүүдийг оролцуулан хэлэлцүүлэг өрнүүлсэн билээ.
Тус форумын үеэр ЦЕГ-ын Хэвлэл мэдээлийн төвийн дарга, цагдаагийн дэд хурандаа Б.Баатархүү “ПИН кодоо хэлэхгүй байх эрх нь хэрэглэгчид байдаг. Асууснаараа буруудахгүй, харин хариулснаараа эрсдэлд ордог. Тиймээс ПИН кодоо хэлэхгүй байх уриалга гаргаж байна” хэмээн ард иргэдийг уриалсан билээ.
Таны ПИН кодыг асуугаад байгаа үйлчилгээний ажилтны янзыг үзээд тооцооны хуудас дээр логарифм бичээд харуулж ч болох юм. Гэхдээ жинхэнэ ПИН кодоо үүгээр илэрхийлж болохгүй шүү.
Эцэст нь, НУУЦ ҮГ гэх нэртэй 4-6 оронтой тооны утгыг дахиад сайн бодож үзээрэй.