2 мин

Баян-Өлгий аймагт цас оржээ

Өнөө шөнө баруун аймгуудын уулархаг нутгаар цочир хүйтэрнэ.

Э.Намуун 2018.09.05 38 32 24

Баян-Өлгий аймгийн ихэнх сумдын нутгаар өчигдөр нойтон цас орсон байна.

Аймгийн Ус, цаг уур, орчны шинжилгээний төвөөс өгсөн мэдээллээр Өлгий, Буянт сумдын нутгаар 0,7 мм хур тунадас буужээ. Мөн Алтай, Бугат, Дэлүүн, Баяннуур, Ногооннуур, Улаанхус, Сагсай, Цэнгэл сумдын нутгаар цас орсон мэдээтэй байна.

Өнөөдөр Улаанбаатарт үүлшинэ. Бороо орно. Салхи баруун хойноос секундэд 6-11 метр, зарим үед секундэд 14-16 метр хүрч ширүүснэ. Шөнөдөө 7-9 градус, өдөртөө сэрүүсч 8-10 градус дулаан байна.

Өчигдөр өдөр нутгийн баруун хагаст өмнөх өдрөөсөө сэрүүсч Дархадын хотгор, Монгол-Алтай, Хангай, Хөвсгөлийн уулархаг нутгаар 6 градус хүйтнээс 1 градус дулаан, Алтайн өвөр говь болон говийн бүс нутгаар 12-17 градус, бусад нутгаар 4-11 градус дулаан хонолоо.

Маргааш төв, зүүн, говийн аймгуудын нутгийн зарим газраар, 9-нд баруун аймгуудын нутгийн зарим газар, төвийн аймгуудын нутгийн баруун хэсгээр бороо орно. Салхи 6-нд говь талын нутгаар, 9-нд баруун аймгуудын нутгийн зарим газраар түр зуур секундэд 15-17 метр хүрч ширүүснэ. Сэрүүсч Дархадын хотгор, Алтай, Хангай, Хөвсгөл, Хэнтэйн уулархаг нутаг, Хүрэн бэлчир, Идэр, Тэс голын хөндийгөөр шөнөдөө 2-7 градус хүйтэн, өдөртөө 6-11 градус, говийн бүс нутгийн өмнөд хэсгээр шөнөдөө 7-12 градус, өдөртөө 20-25 градус, бусад нутгаар шөнөдөө 2-7 градус, өдөртөө 12-17 градус дулаан байна. 7-нд нутгийн баруун хагаст, 8-нд ихэнх нутгаар өдөртөө дулаарна.
Өнөө шөнө баруун аймгуудын уулархаг нутгаар цочир хүйтэрч, төв болон зүүн аймгуудын нутгийн зарим газраар усархаг бороо орох тул, болзошгүй үер усны аюулаас сэрэмжтэй байхыг анхааруулж байна.   .

Э.Намуун 2018.09.05