BTS хамтлагийн Suga муулсан сэтгэгдэлтэй тэмцдэг нууцаа дэлгэлээ
Хүмүүс муулаад бичиж л байг. Маш их бичсэн ч яахав.
Өмнөд Солонгосын хөвгүүдийн BTS хамтлагийн дуучин Suga цахим ертөнцөд муулсан, сөрөг сэтгэгдэлтэй тэмцдэг аргаа дэлгэлээ. Тэрбээр хүмүүст тун зоримог зөвлөгөө өгсөн байна.
Suga энэ сарын 11-нд Vapp Naver-ийн шууд нэвтрүүлэгт оролцож, шүтэн бишрэгчидтэйгээ ярилцлаа. Ярилцлагын үеэр нэгэн фэн нь түүнээс “Та сөрөг сэтгэгдэл уншдаг уу” гэж асуусан юм.
Suga “Би муулсан, гүтгэсэн сэтгэгдэлд огт санаа зовдоггүй. Үнэнийг хэлэхэд би уншдаггүй юм. Хүмүүс муулаад бичиж л байг. Маш их бичсэн ч яахав. Харин дараа нь манай агентлаг тэднийг шүүхэд өгөх болно. Бичсэн зүйлийг нь би уншдаггүй ч тэд шүүхэд дуудагдах болно. Шүүх дээр уучлах, харилцан тохиролцох явдал гарахгүй. Харин ч улам их бичээсэй гэж найдаж байна” гэж хэлсэн байна.