Ерөнхийлөгч Х.Баттулга Каногийн нэрэмжит тэмцээний шагнал гардууллаа
Манай баг 4-р байр эзэлсэн.
ОХУ-ын Владивосток хотод болж буй Дорнын эдийн засгийн IV чуулганы үеэр Жигоро Каногийн нэрэмжит өсвөрийн жүдо бөхийн холимог багийн тэмцээн болж өнгөрлөө.
Хоёр дахь удаагаа болж буй тус тэмцээнийг ОХУ-ын Ерөнхийлөгч В.Путин, Монголын Ерөнхийлөгч Х.Баттулга, Японы Ерөнхий сайд Шинзо Абэ нар үзэж сонирхон, шагнал гардууллаа.
Тэмцээнд ОХУ, Япон, Монгол, Хятад, Өмнөд Солонгос гэсэн таван баг өрсөлдлөө. Баг тус бүр 8 эрэгтэй, 8 эмэгтэй тамирчин гаргасан. Тэмцээний финалд ОХУ, Японы шигшээ багууд шалгарч, өрсөлдөн 8-8 харьцаатай тэнцлээ. Нэмэлт тулаанд Оросын Иосиф Симин Японы Сомаг ялснаар ОХУ-ын шигшээ баг ялалт байгууллаа.
Манай багийн хувьд сугалаагаар урьдчилсан тойрогт Хятадын багтай таарсан. 3 жинд бөхгүй байсан манай баг 3 оноо торгуулсан ч 8 ялж, нийлбэр дүнгээр 8-8 болон тэнцсэн байна. Нэмэлт барилдаанд 50 кг-ийн тамирчид гарч, манай бөх ялж, хагас шигшээд шалгарлаа.
Хагас шигшээд ОХУ-ын багтай таарсан. Энэ удаад 2 жинд бөхгүй барилдаж, 4-12 ялагджээ. Хүрэл медалийн төлөө Өмнөд Солонгосын багтай тааран, эхний 3 барилдаандаа давсан ч 5-10 ялагдсанаар тэмцээнээ 4-р байр эзэлсэн амжилттай өндөрлүүллээ.