1 мин

ВИДЕО: Э.Дэлгэрмаа Залуучуудын ДАШТ-ээс мөнгөн медаль хүртлээ

Словакт манай улсаас найман нядхан зодоглосноос хоёр мөнгө, нэг хүрэл медальтай нутагтаа ирэхээр боллоо.

М.Сугар-Эрдэнэ 2018.09.22 27 27 21

“Трнава-2018” чөлөөт бөхийн залуучуудын ДАШТ-ий дөрөв дэх өдөр эмэгтэйчүүдийн 65 кг-ийн жинд 2016, 2018 оны залуучуудын Азийн АШТ-ий хүрэл, 2016 оны өсвөр үеийн Азийн АШТ-ий мөнгө, насанд хүрэгчдийн УАШТ-ий мөнгө, хүрэл медальт, “Хасу-Мегастарс” клубийн тамирчин Энхсайханы Дэлгэрмаа үзүүрлэв. Энэ нь Трнавад манайхны гурав дахь (Б.Халиунаа 55 кг-д мөнгө, Б.Энхцэцэг хүрэл медаль хүртсэн) медаль болж байна гэж Монголын чөлөөт бөхийн холбооноос мэдээллээ.  
Э.Дэлгэрмаа 1/8 шигшээд өнгөрсөн жилийн өсвөр үеийн ДАШТ-ий хүрэл медальт Польшийн Викториа Чолужийг оноогоор цэвэр (10:0) ялсан.

Шөвгийн наймд Украины Ирина Колиаденког 9:6-гаар ялсан.

Хагас шигшээд 2018 оны залуучуудын ЕАШТ-ий хүрэл медальт Туркийн Асли Демирийг цэвэр ялсан.

Алтан медалийн төлөөх барилдаанд энэ жилийн насанд хүрэгчдийн Азийн дэд аварга Японы Мюү Имайтай хүч үзэж, оноогоор цэвэр (3:13) ялагдав. Словакт манай улсаас найман нядхан зодоглосноос хоёр мөнгө, нэг хүрэл медальтай нутагтаа ирэхээр боллоо.

М.Сугар-Эрдэнэ 2018.09.22