Манай хүргэн ОХУ-ын амбан захирагч болох уу
Амбан захирагч болох хүсэлтэйгээ илэрхийлсэн байна.
Холливудын жүжигчин Стивен Сигал 2016 онд ОХУ-ын иргэн болж, Ерөнхийлөгч В.Путин өөрийн гараар түүнд Оросын паспорт гардуулан өгсөн билээ. Өнгөрсөн сар Сигал ОХУ-ын ГХЯ-ны Орос, Америкийн хүмүүнлэгийн салбарын харилцааны тусгай төлөөлөгчөөр томилогдсон билээ. Тэрбээр эхнэр, хүүхдийн хамт сүүлийн үед Москвагийн ойролцоо Электросталь хотод амьдарч байгаа бөгөөд жилийн ихэнхийг ОХУ-д өнгөрүүлж байгаа аж.
Саяхан Сигал Владивосток хотод Ази, Номхон далайн орнуудын кино наадамд оролцож байхдаа Амбан захирагч болох хүсэлтэйгээ илэрхийлсэн байна.
Сигал “Аавын талаас манай удмынхан энэ нутгаас гаралтай. Би Приморийн хязгаарыг судлаж, аялаж үзмээр байна. Мөн танай Амбан захирагч болмоор байна” гэж хэлжээ.
Энэ сарын 16-нд Приморийн хязгаарт амбан захирагчийн сонгууль болж, “Единая Россия” намын Андрей Тарасенко, Коммунист намын Андрей Ищенко нар өрсөлдсөн. Сонгуулийн дараа тэд нэг нэгнээ сонгуулийн хуулийг зөрчсөн хэмээн буруутгасан юм. ОХУ-ын Сонгуулийн ерөнхий хорооноос сонгуулийн дүнг хүчингүйд тооцож, 3 сарын дараа дахин сонгууль явуулах шийдвэр гаргасан билээ.