1 мин

Видео: Оосүнаараши Боб Сапптай тулалдаж, ялагдлаа

Оосүнараши холимог тулааны анхны ялалтаа авч чадсангүй.

М.Сугар-Эрдэнэ 2018.10.02

Мэргэжлийн сүмогийн анхны африк бөх, Египетийн Оосүнаараши холимог тулаанд хүч үзэж байна. Оосүнаараши есдүгээр сарын 30-нд Японы Сайтамад болсон "RIZIN.13" тэмцээнд орж, Америкийн Боб Сапптай тулалдлаа.

Ингээд Сапп шүүгчдийн саналаар 3-0 ялж, Оосүнаараши холимог тулааны анхны ялалтаа авч чадсангүй.

Тулааны өмнө Оосүнаараши "Би өөрийн буруугаас болж, сүмогийн холбооноос гарсан билээ. Би бүх юмаа алдсан. Тийм болохоор Акэбоно аваргын намайг дэмжсэн үгэнд нулимс гартал баярласан. Заавал ялж, аваргынхаа ачийг хариулна" гэж ярьж байсан юм. Боб Сапп 2003, 2015 онд ёкозүна Акэбоног хоёр дараалан хүнд цохилтоор ялж байсан билээ.

Египетийн сүмоч Оосүнаараши энэ оны нэгдүгээр сарын 3-нд Египетээс ирсэн эхнэртээ газар үзүүлэн явж байгаад Нагано хотод машины осол гаргасан. Тэрбээр эхлээд Сүмогийн холбоонд “Эхнэр жолоо барьж явсан” гэж мэдүүлсэн ч гэрчийн мэдүүлэг, камерийн бичлэгээр өөрөө жолооны ард сууж байсан нь тогтоогдсон. Замын цагдаа шалгахад жолооны эрх байхгүй байжээ. Ингээд Сүмогийн холбооноос Оосүнаарашид “Зодог тайлах” шийтгэл оноосон билээ. Оосүнаараши 2012 оны Хаврын тэмцээнээс барилдаж, 2013 онд дээд зиндаанд дэвшсэн. Макүүчид нийт 17 башё барилджээ.