Бүдүүн эрийг хооллохгүй байхыг бүтэн хотоос гуйжээ
Эмч нар түүнд турахгүй бол удахгүй үхнэ шүү гэж хэлсэн тул Дибси турахаар шийджээ.
Английн Мидлсборо хотын хоолны газруудад хэт таргалалттай нэгэн залуугийн зурагтай хуудас хадагдаж эхэлжээ. Зурагт хуудсанд та бүхнийг энэ залууг хооллохгүй байхыг хүсч байна гэж бичсэн байв.
Бүхэл бүтэн хотод хоол идэх "эрхээ хасуулаад" байгаа энэ бүдүүн залууг Дэррен Макклинток гэдэг, 27 настай. Дибси хочтой. Тарганаасаа болоод тэр машин барьж чаддаггүй, онгоцонд суухдаа хоёр хүний суудал авдаг, бүх хувцсаа захилгаар хийлгэдэг тул маш их зардалтай. Эмч нар түүнд турахгүй бол удахгүй үхнэ шүү гэж хэлсэн тул Дибси турахаар шийджээ.
Түүнд турахад нь хотын алдартай дасгалжуулагч нарын нэг Майк Хинд туслахаар болжээ. Гэхдээ бүр ямар ч хөлс мөнгө авахгүйгээр тураахаар болсон байна. Хиндийн анхны даалгавар хоолны дэглэм барих байлаа. Шавиа энд тэнд нууцаар очоод идүүлчихгүйн тулд тэрбээр Мидлсборо хот даяар хуудас нааж, "Энэ хүн таргалалтаас болоод үхэж байна. Энэ хүнд идэх юм өгөөгүйгээрээ та түүний амийг аварна" гэж уриалсан байна.