Тедди Ринер үл хөдлөх хөрөнгө зарж байна
Францын үл хөдлөх хөрөнгийн том компанитай хамтран ажиллах гэрээ байгуулаад зогсохгүй өөрөө гарч ирээд хэд хэдэн объект заржээ.
Францын алдарт жүдоч, дэлхийн 10 удаагийн аварга Тедди Ринер энэ жил ДАШТ-д оролцоогүй. Ирэх жил ч мөн зодоглохгүй. Ринерийн дасгалжуулагч Франк Шамбили “Бид гол зорилгоо “Токио 2020” олимпийн наадам гэж үзэж байгаа. Энэ наадамд бид Теддиг ямар ч гэмтэл бэртэлгүй оролцуулах болно. Ринер өнгөрсөн ДАШТ-үүдэд байнга гэмтдэг байсан” гэж ярьсан билээ.
Тедди 2019 онд Парисийн Их Дуулгад л хүч сорих бөгөөд одоо зав зай ихтэй байгаа. Саяхан тэр АНУ-ын сагсан бөмбөгч Стефен Карритай уулзаж, цагариганд бөмбөг шидсэн бол одоо үл хөдлөх хөрөнгийн зах зээлд гарч ирээд байна. Тедди Ринер Францын үл хөдлөх хөрөнгийн том компанитай хамтран ажиллах гэрээ байгуулаад зогсохгүй өөрөө гарч ирээд хэд хэдэн объект заржээ.
Тедди Ринер ивээн тэтгүүлээд зогсохгүй өөрөө ч хөрөнгө оруулдаг. Энэ жил тэрбээр Парисийн спортын шинэ сургуульд хөрөнгө оруулсан. Ринер "Тамирчид хоосон толгойтой байдаг гэсэн ойлголтыг үндсээр нь арчин хаяхын тулд энэ төслийг хэрэгжүүлсэн. Сайн тамирчин сайн дипломтой байх ёстой" гэж ярьж байв.
Харин есдүгээр сард Гваделупад түүнд зориулсан талбай байгуулж, хөшөөг нь босгосон билээ.