1 мин

“MNTM” шоуны дараагийн дугаарууд ямартай ч цацагдана

Шоуны 4 дэх дугаар өчигдөр буюу ням гарагт цацагдах ёстой байсан ч олон нийтэд хүрсэнгүй.

Э.Намуун 2018.10.29

“Mongolia’s next top model” шоуны 4 дэх дугаар өчигдөр буюу ням гарагт цацагдах ёстой байсан ч товлосон хугацаандаа олон нийтэд хүрсэнгүй.

Энэ талаар “Боловсрол” суваг телевизийн олон нийттэй харилцах албанаас тодруулахад, “MNTM” шоуны дараагийн дугаар хэзээ цацагдах нь товлогдоогүй байна. Ямартай ч цацагдах болно. Манайхаас энэ талаар албан ёсны мэдэгдэл гаргаагүй байна. Шоуны продюсер ярилцлага өгөх боломжгүй” гэсэн юм.

Тус телевизийнхэн энэ сарын 26-нд албан ёсны хуудастаа “MNTM” шоуг 4 дэх дугаараас эхлэн ням гарагийн 21:00 цагаас цацах тухай мэдээлсэн. Харин үзэгчид тус шоуны оролцогч Ч.Чамин-Эрдэнэ зуурдаар таалал төгссөнтэй холбоотойгоор нэвтрүүлгийн дүрсэнд монтаж хийж байгаа хэмээн үзэж буй бололтой. Үүнийг “Боловсрол” суваг телевизийн олон нийттэй харилцах албанаас лавлахад, энэ тухай албан ёсоор мэдээлэл өгөх боломжгүйг дурдлаа.

Нэвтрүүлгийн оролцогч агсан Ч.Чамин-Эрдэнэд тохиолдсон харамсалтай хэргийг мэргэжлийн байгууллагынхан шалгаж байгаа тул үзэгчдийг ор үндэсгүй, худал мэдээлэлд автаж, цааш түгээхгүй байхыг “Edutainment TV” хуудсаараа дамжуулан хүссэн билээ.