Бензиний үнийг өсгөвөл хашраана гэж Медведев олигархиудад анхааруулав
Эсэргүүцсэн тохиолдолд нефть, нефтийн бүтээгдхүүнийг гадаадад экспортлоход нэмэлт татвар төлдөг болгох тушаал гаргана гэж мэдэгдлээ.
ОХУ-ын Ерөнхий сайд Дмитрий Медведев бензин, түлшний үнийг өсгөвөл 2 хоногийн дотор хариуг нь барьж, хашраана гэдгээ нефтийн компаниудад анхаарууллаа.
ОХУ-ын Төмөр замын 2025 он хүртэл хөгжлийн урт хугацааны програмын хэлэлцүүлэг зохион байгуулсан Дмитрий Медведев бензиний үнэ сүүлийн үед өсөх хандлагатай байгаад анхаарлаа хандууллаа. Ерөнхий сайд Эрчим хүчний яам болон түлш, эрчим хүч хариуцсан Шадар сайд Дмитрий Козак нарт 2 өдрийн дотор нефтийн компаниудтай хэлэлцээ хийхийг үүрэг болгожээ. Хэлэлцээний үр дүнд бензиний үнийг одоогийн түвшинд барих гэрээ байгуулах ёстой гэж Ерөнхий сайд анхааруулаад нефтийн компаниуд эсэргүүцсэн тохиолдолд нефть, нефтийн бүтээгдхүүнийг гадаадад экспортлоход нэмэлт татвар төлдөг болгох тушаал гаргана гэж мэдэгдлээ. Хэрэв их хэмжээний нэмэлт татвар оноовол нефтийн экспортоос ашиг олох нь багасах юм.
ОХУ-ын Ерөнхий сайд Дмитрий Медведевийн энэхүү мэдэгдэл Монголд ч бензиний үнийг барихад гол хүчин зүйл болох юм.