Флойд Мейведер Японд холимог тулааны тэмцээнд оролцоно
Мэргэжлийн рингэнд 50 тулалдаж, 50 ялсан түүний өрсөлдөгч нь Японы шинэ од Тэншин Насүкава юм.
Мэргэжлийн боксын домог, ялагдашгүй аварга Флойд Мейведер холимог тулаанд хүч сорих болжээ. Өнөөдөр Японы нийслэл Токиод болсон “Risin Fighting Federation” холбооны хэвлэлийн бага хурал дээр Флойд энэ талаар зарлалаа. Флойд Мейведер Японы Сайтамад 12-р сарын 31-нд болох “Risin 14”тэмцээнд оролцох болжээ.
Мэргэжлийн рингэнд 50 тулалдаж, 50 ялсан түүний өрсөлдөгч нь Японы шинэ од Тэншин Насүкава юм. Тэншин кикбоксоор 27 тулалдаж 27 ялсан, холимог тулаанд 4 удаа оролцож, 4 ялсан, бас ялагдаагүй байгаа 20 настай тулаанч.
Гэхдээ япон тулаанч Флойдоос 11 см намхан, 56,7 кг-ийн жинд тоглодог. Харин Флойд 2005 оноос хойш 66,7 кг-аас доош жинд тоглож үзээгүй.
“Risin Fighting Federation” холбооны тэргүүн Нобүки Сакакибара “Ямар жинд тоглох болон ямар дүрмээр тулалдах ч тодорхой болоогүй байна” гэж мэдэгдсэн байна. Сэтгүүлчид шагналын мөнгөний талаар асуухад тэрбээр “Нууц. Гэхдээ мэдээж Флойд бага мөнгөөр тоглох хүн биш шүү дээ. Шоу гэж хэлэх хүн байж болох ч жинхэнэ тулаан” гэж хариулжээ.