Далай лам хойд дүрээ өөр аргаар тодруулна гэв
Энэ жил 83 настай Далай лам хойд дүр нь заавал хүүхэд байх албагүй гэж хэлсэн байна.
Дээрхийн Гэгээнтэн XIV Далай лам Японы “Nikkei Asian Review” сонинд ярилцлага өгөхдөө хойд дүр тодруулдаг олон зуун жилийн уламжлалыг өөрчлөх бодолтой байгаагаа ярьжээ.
Энэ жил 83 настай Далай лам өөрийн хойд дүр нь заавал хүүхэд байх албагүй гэж хэлсэн байна. Сүүлийн 600 жилийн турш Далай ламын хойд дүр дандаа бяцхан хүүхэд байсан билээ.
Далай лам “Миний хойд дүр ахимаг насны лам байж болно. Эсвэл 20 насны залуу ч байж болох юм. Хойд дүр тодруулах уламжлалыг өөрчлөхөд дээд лам нарын зөвлөлийн зөвшөөрөл хэрэгтэй” гэжээ. Энэ зөвлөл нь 11 дүгээр сарын сүүлчээр хуралдах гэнэ. Дээрхийн Гэгээнтэн 2007 онд Далай ламыг Ватиканд Хамба ламыг тодруулдагтай ижил системээр сонгох санал дэвшүүлж байв.
Өнгөрсөн жил Далай лам хойд дүрээ Монгол, эсвэл Хойд Энэтхэгийн Хималайн нуруунаас олж болно гэж хэлж байсан билээ.