Нас барсан эзнийхээ бичлэгийг үзээд уярсан муур
Муур утсаа харж байгаад тэврээд унтдаг болжээ.
Муур эзэндээ үнэнч гэдгийг харуулсан нэгэн бичлэг цахим ертөнцөөр аялаж байна. Энэхүү муурны эзэн машины ослоор нас барсан аж. Эзэн чинь дахиж хэзээ ч ирэхгүй гэж амьтанд тайлбарлах боломжгүй. Муур өдөр бүр хаалганы дэргэд эзнээ хүлээн зогсож, үдэш нь эзнийхээ буйдан дээр жижүүрлэнэ.
Муур дотроо бэтгэрээд эхэлснийг гэрийнхэн нь анзаарсан байна. Ингээд түүний сэтгэлийг бага зэрэг ч гэсэн тайтгаруулахаар эзнийх нь амьд ахуй цагтаа авахуулсан бичлэгүүдийг тавьж үзүүлжээ. Муур гар утсыг анхааралтай ажиглан, эзнийхээ царайг харж, дуу хоолойг нь сонслоо. Дараа нь тэр эзэндээ эрхэлж байгаа мэт утсан дээр хэвтэхэд, нүд нь гунигаар дүүрсэн байв.
Одоо түүнд орой бүр эзнийх нь бичлэгийг үзүүлдэг болсон. Муур утсаа харж байгаад тэврээд унтдаг болжээ.