1 мин

А.Амарсанаа мэргэжлийн сүмогийн гараагаа ялалтаар эхэллээ

Асашёорюү аваргын дүү С.Бямбасүрэнг өрсөлдөгчөөрөө нэрлэсэн байна.

М.Сугар-Эрдэнэ 2018.11.13 28 22 11

17

Монголын сүмогийн нэгэн ирээдүй гэгдэж байгаа А.Амарсанаа Фүтагояма дэвжээнд элссэн талаар бид мэдээлсэн билээ. Өнөөдөр манай бөх мэргэжлийн сүмогийн анхны барилдаанаа маэзүмод хийж, ялалт байгуулсан байна. 19 настай А.Амарсанаа нь өнгөрсөн жил Японы ахлах сургуулиудын ёкозүна болсон бөгөөд гадаадын анхны ёкозүна гэсэн хүндтэй цол хүртсэн. 

Түүний шикона дэвжээний нэр нь Роога 狼雅 болсон байна. Эхний ханз нь чоно гэсэн ханз бөгөөд харин Га гэдэг нь Фүтагояма оякатагийн барилдаж байх үеийн нэрний эхний ханзыг авчээ. Фүтагояма ояката бол озэки байсан Миябияма юм. Га хэмээх ханз нь чимээгүй ч ганган, гоёмсог гэсэн утгатай. Ингэхээр манай А.Амарсанаа даруухан, дөлгөөн ч сүрлэг чоно гэсэн нэртэй болжээ. 

Роога өнгөрсөн жил Бүх Японы аварга шалгаруулах тэмцээний үзүүр түрүүнд Асашёорюү аваргын дүү С.Бямбасүрэнг ялж байв. Тиймээс ч түүнийг өрсөлдөгчөөрөө нэрлэсэн байна.  
"Ояката анхааралтай барилдаарай гэж хэлсэн. Бага зэрэг биеэ барьсан ч сайхан байлаа. С.Бямбасүрэн Хоошёорюү банцүкэ маш дээгүүр байгаа болохоор түүнийг хурдан гүйцэх зорилготой" гэж хэлжээ. Сүмод хэн нэгнийг өрсөлдөгчөөр нэрлэж, өрсөлдөж байж, хүчтэй болдог гэж ярьдаг. Өрсөлдөгчөө давж гараад дахин шинэ өрсөлдөгчтэй болох зэргээр банцүкэ дээшлэн ахидаг билээ.  
А.Амарсанаа энэ жилийн 3-р сард ахлах сургуулиа төгсөж, 4-р сард Фүтагояма дэвжээнд орсон ч визийн ангилалаа өөрчлөх, гадаад бөхийн туршилтын 3 сар гэсэн урт хугацааг туулан, 9-р сард шинэ бөхийн эрүүл мэндийн үзлэгт орсон. Сургуулиа төгссөнөөс хойш 8 сарын дараа л маэзүмо барилдаж байна. 

М.Сугар-Эрдэнэ 2018.11.13

17