Өвөрмонголын Хачико эзнээ 80 хоног хүлээж байна
Эзнийг нь энд машин дайрчихснаас хойш энэ нохой үргэлж байгаа.
Өвөрмонголын Хөххотын нэгэн зам дээр үнэнч нохой эзнээ эргэж ирэхийг 80 гаруй хоног хүлээж байна. Яг энэ замыг гарч яваад эзэн эмэгтэй нь наймдугаар сарын 21-нд машины ослоор амиа алдсан бөгөөд нохой одоо болтол эзнээ хүлээсээр байгаа аж.
Энэ сарын 11-нд үнэнч нохойны талаар авсан бичлэг Хятадын China Weibo сайтад 1,4 сая хандалт авсан байна.
"China News Agency" агентлагийн мэдээлснээр нутгийн иргэд нас барсан эмэгтэйн ар гэрийнхнийг эрэн хайж байгаа гэнэ. Хэрэв тэд нохойг авахгүй гэх юм бол өөр аюулгүй газарт нохойг аваачих юм.
"Эзэндээ их хайртай байсан бололтой. Эзнийг нь энд машин дайрчихснаас хойш энэ нохой үргэлж байгаа. Би өдөр бүр хардаг. Жолооч нар түүнд хоол өгдөг. Гэхдээ машинаас гарангуут нохой зугтчихдаг юм" гэж нэгэн таксины жолооч BBC-д ярилцлага өгөхдөө хэлжээ.