Санаев буюу Санаа Тувад ч байртай боллоо
Тувагийн тэргүүн Шолбан Кара-оол Кызыл хотод 2 өрөө байр бэлэглэж байгаагаа дуулгалаа.
Будапештэд болсон чөлөөт бөхийн ДАШТ-ий 57 кг-ийн жингийн мөнгөн медальт Нурислам Санаевт Казахстаны Актоба хотын захиргаанаас 2 өрөө байр олгосон талаар бид мэдээлсэн билээ. Санаев ОХУ-ын Тувагийн уугуул ч 2014 онд иргэншлээ сольж, Казахстаны багийн өмнөөс барилдах болсон юм. 2016 онд Артас Санаа гэдэг тува нэрээ Нурислам Санаев болгон өөрчилсөн.
ДАШТ-ий дараа Нурислам Санаев эхлээд суугуул нутаг Казахстанд очсон. Дараа нь төрсөн нутаг Тувадаа иржээ. Тувагийн Кызыл хотын нисэх буудалд найрал хөгжим эгшиглэн, Тувагийн баатарлаг хүүгээ угтан авлаа. Нисэх буудлаас 10 хар жийп машины цуваа түүнийг аван хөдөлсөн бөгөөд дугаарынх нь оронд "Артас Санаа аварга" гэсэн бичигтэй байв.
Санааг Тувагийн тэргүүн Шолбан Кара-оол хүлээн авч уулзан, ДАШТ-д гаргасан өндөр амжилтыг үнэлэн, Кызыл хотод 2 өрөө байр бэлэглэж байгаагаа дуулгалаа. Бэлэг гардуулсны дараа Шолбан Кара-оол Артаст тува хүүхдүүдтэй мастер класс хийх санал тавиад, эх орондоо байн байн ирж, эрч хүч авахыг хүсэн ерөөлөө. Төрийн тэргүүнтэйгээ уулзсан Артас Санаа гол зорилгоо "Токио 2020" наадмын алтан медаль гэж тодорхойлсон байна.
Артас ДАШТ-ий өмнө Казахстаны Актоба хотод ивээн тэтгэчийнхээ гарт амьдарч байсан юм. Харин дэлхийн аваргын мөнгөн медаль хүртсэнийхээ дараа Актоба хотод байртай болсон. Ийнхүү тува залуу уугуул, суугуул хоёр нутагтаа хоёуланд нь байртай боллоо.