Конишики: Кисэносато муу багштай
Банцүкэ дор багшаас үг сонсохыг Кисэ хүсдэггүй байж болох
Япон ёкозүна Кисэносато Кюүшюү башёд гэмтэл аван, тэмцээнийг орхисон нь сүмогийн ертөнцөд нэлээд шуугиан тариад байна. Тэмцээнээс маш олон гарч байсан тул шуугих зүйл биш ч сүмогийн мэргэжилтэн, шинжээч нар түүнийг одоо болно, зодог тайл гэж шүүмжилж байгаа юм.
Хавайн арлын бөх, озэки асан Конишики Японы "Фүжи" телевизийн шууд нэвтрүүлэгт оролцож, энэ талаар үзэл бодлоо хэллээ.
"Ямар ч барилдаан алга. Өөрөө дайрах, урагш явах юм байхгүй, хүлээгээд л. Юм л бол зүүн шуудагны барьц аваад, баруун гараа огт ашиглахгүй байна. Ояката багштайгаа сайн зөвлөх хэрэгтэй. 12-р сард болох өвлийн тойргийн барилдаанд оролцохгүй бол барилдааны мэдрэмж байхгүй болно. Кисэносатогийн гол асуудал бол сэтгэл зүй. Хоёр аварга өнжөөд ганц ёкозүна үлдэхээр нь би Кисэносаод боломж гарлаа гэж бодож байсан. Гурав дахь өдөр унахад нь бөхийн хорхойтнууд ч итгэл алдарсан. Би энэ өдөр ордонд очиж үзсэн. Маргааш ч унах юм байна гэж шууд ойлгосон. Оякататайгаа ямар харилцаатай байдаг нь сонин байна. Ояката нь барилдаж байх үедээ маэгашира л байсан болохоор ёкозүнад зөвлөгөө өгч чаддаггүй байх. Банцүкэ дор багшаас үг сонсохыг Кисэ хүсдэггүй байж болох" гэж ярьжээ.