1 мин

Бичлэг: Монгол - Хонконг 1:5

Ялж чадаагүй ч тоглолт бүрд гоол оруулсан нь манай шигшээ багийн ур чадвар сайжирсаар байгааг харуулж байна.

М.Сугар-Эрдэнэ 2018.11.17 34 31 27

Зүүн Азийн АШТ-ий хоёрдугаар шатанд анх удаа өрсөлдөж байгаа Монголын шигшээ баг өчигдөр тэмцээний сүүлийн тоглолтоо Хонконгийн хүчтэй багийн эсрэг хийлээ.

БНАСАУ-ын багтай цааш шалгарах эрхийн төлөө гоолын зөрүүгээр өрсөлдөж байгаа Хонг-Конгийн шигшээ багт гоолын тоо чухал байсан учир тоглолтын эхнээс хурдтай довтолгоонуудыг өрнүүлж байлаа. Үүний үр дүнд 23 дахь минутад тэд бразил гаралтай довтлогч Сандрогийн гоолоор тэргүүлж эхэлсэн. Энэ гоолоос 12 минутын дараа Хонконгийн шигшээ багийн Англи гаралтай тоглогч Жеймс МакГий тооны зөрүүг 2 болгон холдууллаа.

Тоглолтын эхний хагас энэ үр дүнгээр өндөрлөсөн. 2-р хагасын 5 дахь минутанд манай шигшээ тооны зөрүүг ойртуулж, А.Нармандах тооны самбарт нэрээ гаргалаа. Үлдсэн цагт Хонконгийн баг дахин 3 гоолыг бүртгүүлсэн ч манай залуус өөрт олдсон хэд хэдэн боломжийг алдаж, эцэст нь 5:1-ийн харьцаатай ялагдал хүлээлээ гэж Монголын хөлбөмбөгийн холбооноос мэдээллээ. 

Тус тоглолтын дараа Герман дасгалжуулагч Майкл Вайсс сэтгүүлчдэд өгсөн ярилцлагадаа: "Бидэнд анхаарах ёстой асуудал маш их байна. Мэдээж энэ шатанд гарна гэдэг бидний хувьд асар их туршлага. Энэ бол ердөө л бидний суралцах үйл явц" гэж хэллээ.

Үнэхээр ялж чадаагүй ч тоглолт бүрд гоол оруулсан нь манай шигшээ багийн ур чадвар сайжирсаар байгааг харуулж байна. 
Ийнхүү Хонконгийн шигшээ баг ирэх онд Зүүн Азийн АШТ-ий аваргын төлөө БНСУ, ЯПОН, БНХАУ-ын багуудтай тоглох эрх авлаа.

М.Сугар-Эрдэнэ 2018.11.17