U23 ДАШТ: Хүрэл медальт Г.Ганхуягийн барилдааны бичлэгүүд
Тэрбээр Румынд манай тамирчдын дөрөв дэх, эрэгтэйчүүдээс цорын ганц хүрэл медалийг авчирлаа.
“Бухарест-2018” чөлөөт бөхийн 23 хүртэлх насанд хүрэгчдийн ДАШТ-ий сүүлийн өдөр эрэгтэйчүүдийн 86 кг-ын жинд “Монголиа Опен” ОУТ-ий мөнгө, УАШТ-ий хошой хүрэл медальт, “Аваргууд” спорт хорооны тамирчин, спортын мастер Ганбаатарын Ганхуяг хүрэл медалийн эзэн боллоо. Тэрбээр Румынд манай тамирчдын дөрөв дэх, эрэгтэйчүүдээс цорын ганц хүрэл медалийг авчирлаа. Түүнчлэн манай эрэгтэй бөхчүүдээс “U-23”-ын ДАШТ-ээс анхны медальтан болж байна гэж Монголын чөлөөт бөхийн холбооноос мэдээллээ.
23 хүртэлх насны ДАШТ-д хоёр дахиа зодоглосон Г.Ганхуяг Бухарестийн дэвжээнд 1/8 шигшээд эзэн орны Михай Николае Палахиаг 8:6-гаар ялсан.
Шөвгийн наймд АНУ-ын Майлз Мартиныг 6:1-ээр давсан.
Хагас шигшээд 2013 оны өсвөр үеийн ДАШТ-ий мөнгөн медальт, Азийн аварга Ираны Камран Гасемпурт 0:4-ээр ялагдсан.
Хүрэл медалийн төлөө энэ жилийн залуучуудын дэлхийн болон Европын аварга Туркийн Ариф Озентэй барилдаж, 4:1-ээр яллаа.