Казахстанд Айшолпаны тухай баримтат кино гарлаа
"Моңғолия қазақтары: Бүркітшілер" кино нь гадаад орнуудад аж төрж байгаа казах иргэдийн тухай хийх цуврал киноны хамгийн эхнийх нь.
Казахстаны найруулагч Канат Бейсекеев "Моңғолия қазақтары: Бүркітшілер" баримтат киногоо олны хүртээл болголоо. Канат энэхүү киногоо "Казахстан" телевизийн сувагтай хамтран бүтээсэн бөгөөд гол баатар нь манай Айшолпан Нургайыпкызы охин. Айшолпаны тухай кино өмнө нь гарч байсан. Америкийн найруулагч Отто Беллийн 2016 онд хийсэн "Eagle Huntress" кино түүнийг дэлхийд таниулсан билээ.
Найруулагч Канат Бейсекеев кинондоо Монгол дахь казах түмний тухай мөн өгүүлсэн байна. Тэрбээр инстаграмдаа "Залуус аа, Монголын тухай манай кино Youtube дээр тавигдлаа. Энэ кино бол зөвхөн Айшолпаны тухай биш Монгол дахь казах түмний амьдрал, ёс заншил, бүргэдийн ан, эцэг эх хүүхдийн харилцаа, байгаль, ан амьтнаа хайрлах гээд олон зүйлийн тухай өгүүлсэн бүтээл" гэж бичжээ.
"Моңғолия қазақтары: Бүркітшілер" кино нь гадаад орнуудад аж төрж байгаа казах иргэдийн тухай хийх цуврал киноны хамгийн эхнийх нь. Нийт 12 анги хийнэ гэж "Казахстан" суваг мэдэгдсэн байна.