ОХУ-ын сайд төрөлтийг нэмэгдүүлэх гол нөхцөл нь орон сууц гэв
Ганц хүүхэдтэй гэрбүл эхлээд ипотекийн зээлээ төлж дуусгах гээд 2, 3 дахь хүүхдээ төрүүлэхийг хүсдэггүй.
ОХУ-ын Засгийн газрын нийгмийн асуудал хариуцсан Шадар сайд Татьяна Голикова ОХУ-д төрөлтийн тоо багасч байгаад сэтгэл зовниж байгаагаа илэрхийлжээ. Голикова "Российская газета" сонинд ярилцлага өгөхдөө төрөлтийг нэмэгдүүлэх хүчин зүйлсийн талаар ярьсан байна.
Шадар сайд "Хүмүүсийг хүчээр хүүхэд төрүүл гэж шахах боломжгүй. Харин хүүхэд төрүүлэх нөхцлийг нь бүрдүүлээд өгвөл хүн амын тоо нэмэгдэнэ. Гол нөхцөл бол орон сууц. Орон сууцны үнэ хямд, байранд орох боломж өндөр байх хэрэгтэй. Орон сууцтай гэрбүлийн амьдрал тайван амгалан, ирээдүйдээ итгэлтэй байдаг. Байрны сэдэв хөндөнгүүт ипотекийн асуудал заавал сөхөгддөг. Ганц хүүхэдтэй гэрбүл эхлээд ипотекийн зээлээ төлж дуусгах гээд 2, 3 дахь хүүхдээ төрүүлэхийг хүсдэггүй. Харин төлөөд дуусах үед нас ахичихсан байдаг" гэж хэлжээ.