Трамп, Ким Жон Ун хоёр Монгол, Вьетнам, Индонезийн аль нэгэнд уулзана
Дээрх 3 улсаас хамгийн өндөр боломжтой нь Вьетнам гэж шинжээчид үзэж байна.
"Вьетнамын Засгийн газар АНУ-ын Ерөнхийлөгч Доналд Трамп, БНАСАУ-ын Удирдагч Ким Жон Ун нарын хоёр дахь уулзалтыг хүлээн авах хүсэлтэй байна" гэж CNN мэдээллээ.
Мэдээнд дурдсанаар Вьетнамын өндөр албан тушаалын хүмүүс БНСУ-ын Ерөнхийлөгч Мүн Жэ Интэй энэ талаар хэлэлцсэн байна. Трамп, Ким Жон Ун нарын анхны уулзалтыг зохион байгуулахад бэлэн гэдгээ Вьетнам улс Монгол, Индонезийн адил илэрхийлж байсан. Энэ 3 улсад БНАСАУ-ын ЭСЯ байдаг билээ.
Энэ сарын эхээр АНУ-ын Ерөнхийлөгч Трамп "Ирэх оны 1 эсвэл 2-р сард Ким Жон Унтай дээрх 3 орны аль нэгэнд уулзах болно" гэж мэдэгдсэн. Гэхдээ тэргүүн нарын хоёр дахь уулзалт дахиад Сингапурт явагдах магадлалтай гэсэн мэдээ гараад байгаа. Дээрх 3 улсаас хамгийн өндөр боломжтой нь Вьетнам гэж шинжээчид үзэж байна. АНУ-ын Төрийн нарийн бичгийн бичгийн даргын Зүүн Ази, Номхон далайн асуудал хариуцсан туслах Марк Ламберт саяхан Вьетнамд очсон. Дээд хэмжээний уулзалтын талаар ярилцсан эсэх нь тодорхойгүй ч БНАСАУ-ын Гадаад хэргийн сайд Ри Ён Хо энэ сарын эхээр Вьетнамд айлчилсан гээд Трамп, Ким Жон Ун нар Вьетнамыг сонгосон байх магадлал өндөр байна.