Хятадууд Украинд бөхөн үржүүлнэ
Гэхдээ тэд мэдээж зөвхөн байгаль дэлхийгээ хайрлах зорилгоор энэ гэрээг байгуулаагүй.
Хятадын "Шичжень Тан Фармасьютикал" компаниас дэлхийд нэн ховордсон бөхөн гөрөөсийг Украинд үржүүлэх гэрээ байгуулжээ. Тус компани энэ зорилгоор Херсон мужид 97 га газар 7 жилийн хугацаатай түрээсэлсэн бөгөөд нийт 10 сая гривений хөрөнгө оруулалт хийх гэнэ.
Украинд хамгийн сүүлчийн зэрлэг бөхөн 1898 онд анчны гарт амь үрэгдсэн байдаг. 1979 онд Халимагаас Украины "Аскания-Нова" дархан цаазат газарт 70 бөхөн аваачсан нь одоо 600 толгой болон нэмэгджээ.
Хятадын бизнес эрхлэгчид эхний удаад 23 бөхөн тус дархан цаазат газраас худалдан авсан байна. Тэд төслөө амжилттай хэрэгжиж, Төв Азид ХІХ зууны үе шиг бөхөн сүрэглэн бэлчдэг болно гэж найдаж байна.
Гэхдээ тэд мэдээж зөвхөн байгаль дэлхийгээ хайрлах зорилгоор энэ гэрээг байгуулаагүй. Бөхөн гөрөөсний эвэр нь Хятадад хирсний эвэр мэт эмчилгээний чухал эдэд тооцогддог. 2015 онд Казахстанд халдварт өвчнөөр 150 мянган бөхөн үхсэний дараа Хятадын зах зээл дээр бөхөнгийн эвэрний үнэ эрс өссөн гэнэ. Тиймээс Хятадын компани ашгаа бодож байгаа бол Украин улс ховордсон амьтнаа гадаадын хөрөнгө оруулагчийн мөнгөөр үнэгүй өсгөх боломжтой болж байгаа юм. Хэрэв төсөл амжилттай болбол Украины өөр мужид ч Хятадтай хамтран бөхөн үржүүлэх төв байгуулах гэнэ.