Тунгаа “Natural” Kelly-тэй тулалдана
ОХУ-ын Марат Гафуровын эзэмшиж байгаа дэлхийн аваргын бүсийн төлөө тоглоход нэг алхам ойртох болно.
Монгол Улсын Гавьяат тамирчин, холимог тулааны “One Championship” холбооны дэлхийн аварга асан Ж.Нарантунгалагийн ээлжит тулааны тов гарлаа. Тунгаа ирэх сарын 2-нд Хятадын Аньхүй мужийн Хэфэй хотод болох “One: Dynasty of Champions” тэмцээний гол тулаанд хүч сорих болжээ. Өрсөлдөгч нь URCC-ийн 65.8кг-ийн аварга асан, Филиппин улсын тамирчин Эрик Келли буюу Eric “The Natural” Kelly.
Манай тамирчин өнгөрсөн тавдугаар сард Японы Бокү Котэцүг ялж, дэлхийн аварга цолоо эргүүлэн авахад алхам ойртсон. Түүний өрсөлдөгч Эрик Келли хамгийн сүүлд энэ оны нэгдүгээр сард Малайзийн TING-д ялагдсан. Гэхдээ тэр холимог тулаанд 14 тулалдахдаа 12 ялж, хоёрхон ялагдсан хүчтэй тамирчин. Хэвтээ байдлаас тулалдахдаа гарамгай, 12 ялалтынхаа 9-д нь өчих, боох мэхээр ялж байсан. Гэхдээ 2012 онд UFC-ийн 70.3 кг-ийн анхны аварга Женс Палверийг хүнд цохилтоор буулган авсан, боксын техник ч муугүй тулаанч аж. Келли 2013 онд “ONE Championship” холбооны дэлхийн аваргын төлөө тулалдсан ч Филиппиний Хонорио Банариод хүнд цохилтоор ялагдаж байжээ. Харин Банариог Тунгаа 2014 оны тавдугаар сард ялж байлаа.
Энэ хоёр тамирчны хэн ялсан нь ОХУ-ын Марат Гафуровын эзэмшиж байгаа дэлхийн аваргын бүсийн төлөө тоглоход нэг алхам ойртох тул маш чухал тэмцээн болно.