2018 оны ялагчид: Мягмардуламын Нандинцэцэг
Эмэгтэйчүүдийн боксын төрөлд анхны медалийг эх орондоо авчирна гэдэг яалт ч үгүй түүхэн амжилт.
Тэр өөрөө ч том бэлэг
Монголын Үндэсний олимпийн хорооны Ерөнхий нарийн бичгийн дарга, Хөдөлмөрийн баатар, Гавьяат тамирчин Э.Бадар-Ууган
Мягмардуламын Нандинцэцэг бол Монголын боксын спортод илгээсэн том бэлэг. Тэр саяхан түүхэн дээд амжилтыг тогтоогоод эх орондоо ирсэн. Эмэгтэйчүүдийн боксын төрөлд анхны медалийг эх орондоо авчирна гэдэг яалт ч үгүй түүхэн амжилт. Тэрбээр намайг ид тоглож байхад хамт бэлтгэл хийдэг байлаа. Энхбаатар багшийн шавь байсан. Биднийг дагаад “Ах аа, болж байна уу? Ингэвэл яах вэ” гээд зөвлөгөө авч, тууштай хичээллэдэг маш хөдөлмөрч тамирчин. Тэрнээс хойш олон жил хичээллэж, маш их хөлс урсгаж байж энэ амжилтыг гаргалаа. Энэ бол бахархал.
Манай Нандиа хичээл сургууль, хувийн амьдрал гээд бүх зүйлээ хойш тавьж, энэ спортод зүтгэсэн. Тиймээс сая Дэлхийн аваргаас медаль хүртэхэд нь бид бүгд л баярлалаа. Би хүртэл төрсөн дүү минь медаль авсан мэт баярласан. Мөн энэ жил Монголд боксын спорт үүссэний 70 жилийн ой тохиож байна. Ойдоо маш том бэлэг барилаа. Гэхдээ тэр зөвхөн медиалиар бэлэг барьсан бус өөрөө л боксын спортод том бэлэг юм даа.